Rampumah Republic Day lawmna hun hman a ni
Republic Day vawi 66-na chu nimin khan ram pumah lawm a ni a, a lawmna pui ber Delhi, Rajpath-ah chuan venhimna khauh tak hnuaiah ropui taka lawm a ni.
Republic Day lawmnaah hian US President Barack Obama chu khuallian a ni a, kum 1950-a Republic Day Parade neih ṭan a nih aṭangin Obama hi US President zinga khuallian hmasa ber a ni.
Darkar hnih awh parade-ah hian ralthuam chi hrang hrang pholan a ni a, a ṭum khatna atan long-range maritime surveillance leh anti-submarine P-8I aircraft bakah long-range advanced MiG-29K fighter plane-te entir a ni. Hei bakah hian tableau 25 entir a ni bawk. State leh union territory 16 te'n tableau hi buatsaihin, a dangte hi central ministry leh department-te buatsaih a ni.
Kumina Republic Day lawmnaah hian kum danga thleng ngai lo, a ṭum khatna atana thleng eng emaw zat a awm. Kumina parade theme atana 'Women's Empowerment' tih hman a nih angin, a vawikhatna atan Army, Navy leh Air Force-te'n all-women contingent an nei a, khuallian atana US President hman a nih vawikhatna a nih bakah kumdanga tihdan phung ang loin, kuminah chuan President leh chief guest-te chuan motor hran ve vein Rajpath an pan.