India leh US-in civil nuclear deal an siam thei ta

India leh US-in civil nuclear lama thawhdunna tura inremna an siam tum, kum sarih zet tangkhang tawh chu Pathian­ni khan US President Barack Obama leh Prime Minister Narendra Modi-te chuan an inkawmnaah an sawifel thei ta.

Civil nuclear deal siam tum hian PM hlui, Manmohan Singh hunlai aṭang khan hma lak lo ni tawh mah se, US hian inremna tluantling a siam­pui duh mai loh vangin hun rei tak tihkhawtlai a lo ni tawh a ni.

Ram hruaitu pahnihte hi darkar thum chuang zet an inkawm a, a inkawm zawh hnu hian Foreign Secretary Sujatha Singh chuan civil nuclear deal chu sawifel a ni ta tih a sawi a, US pawhin civil nuclear program chungchanga ram pahnihte inhriatthiam lohna chu chinfel a ni ta tih a sawi bawk.

Inremna siam a nih tak avangin US company-te chuan India hnenah nuclear technology an hralh thei tawh dawn a, mahse US Deputy National Security Adviser Ben Rhodes chuan inremna hi siam ni tawh mah se, US company-te chuan market lamte zirchiangin, India nuclear program-a tel an duh leh duh loh chungchanga thutlukna chu an la siam dawn a ni, a ti.