Rajya Sabha-ah NDA-in majority nei pha lo

Rajya Sabha-a nominated member pali - Rakesh Sinha, Ram Shakal, Sonal Mansingh, leh Mahesh Jethmalani te chu Inrinni liam ta khan an term a tawp a, BJP MP neih pawh a tlahniam ve nghal.

Heng MP chawl ta palite hi President Droupadi Murmu-in rorellai party, BJP thurawn anga non-aligned member atan a ruatte an ni. Member pali term a zawh ve leh tak avangin BJP hian Rajya Sabha-ah MP 86 an nei ta a ni. BJP kaihhruai, National Democratic Alliance (NDA) MP awm zat pawh 101-ah a tla thla a, member 245 awmna House-a majority nei tur MP neih ngai zat 113 chu 12-in an pha tawh lo a ni.

Tuna Rajya Sabha member awm zat hi 225 an ni mek. Congress kaihhruai INDIA bloc chuan 87 an nei a, heng zingah 26 chu Congress member niin, Trinamool Congress-in 13, Aam Aadmi Party leh DMK in 10 ve ve an nei bawk.

Rajya Sabha-ah an member neih zat a tlakhniam tak avangin NDA hian Upper House-a bill pass-na turah non-NDA party-te thlawpna a mamawh dawn hle a ni. NDA party MP-te bakah, member dang 13 tal puihna a mamawh tawh ang. A bikin member 11 nei, YSR Congress Party leh member pali nei, AIADMK te an pawimawh tawh dawn hle. Hemi rual hian non-aligned member pasarih an la awm mek a, hengte leh independent puihnate chu NDA hian a la hmuh chhunzawm zel a rinawm. Upper House-a an dinhmun sawhngheh zelna tur hian nominated seat-te hi a hnawhkhah thuai pawh a rinawm bawk a ni.

Rajya Sabha-ah hian nominated member hi 12 an awm a, hengte hi party zawm bik nei lo anga lak luh vek ni mah se, sorkar laipuiin a ruatte an nih avangin thutlukna siamnaah pawh rorellai party lam an thlawp ṭhin.