Amit Shah-a'n Assam, UP leh Gujarat CM-te a bia

Union home minister Amit Shah chuan nimin khan ruahsur nasa leh tuilian avanga harsatna thlenna, Assam, Uttar Pradesh leh Gujarat chief minister-te a bia a, an dinhmunte zawtfiahin harsatna an tawh mekah sorkar laipuiin puih a inhuam reng thu a hrilh.

Shah chuan harsatna thlennaah hian pui turin National Disaster Response Force te tirh an nih tur thu a sawi bawk.

Assam-ah hian district 18 chuan tuilian hi an la tuar a, Cachar chu tuar nasa an ni. Kuminah ruahsurin chhiatna a thlen leh tuilian vanga thi hi mi 90 chuang an tling tawh a ni. Thlai chinna ram hectare 25367.61-a zau chu tuiin a chim a, revenue cirle 52 hnuaia khaw 1,342 te pawh tuiin a la chim mek a ni.

Uttar Pradesh-ah chuan an state khawchhak lam leh laili bialten tuilan hi an tuar a, ruahsur nasa avanga lui tam tak lian chuan thingtlang khaw 900 chuanga mi nuai 18 vel a nghawng a ni. Chief minister Yogi Adityanath chuan thlawhtheihna hmangin tuilenna bialte hi a enkual a, official-te hnenah harsatna tawkte chu an theih dan ang anga pui turin a chah.

Gujarat-ah pawh hmun hniam lam tuiin a la chim nasa hle a, national highway-te pawh a nghawng a ni. Heng hmuna tui tlingte paih tur hian disaster cell team tirh an ni a, ruahsur avangin Madhuban Dam-a tui awm zat pawh a sang chak hle.

India Meteorological Department chuan nimin khan Kerala, Karnataka leh Konkan Goa-ahte tunkar chung hian ruah nasa tak leh thlipui thawk thei reng a nih tih sawiin, red alert an ti chhuak. Hei bakah hian Maharasthra-a district pali tan red alert hi an ti chhuak tel bawk. Delhi NCR-ah pawh tunkar hian ruah leh thli a thawk dawn niin an sawi a, mahse colour coded alert erawh tih chhuah a ni ve lo thung.