Kejriwal hi 'coma' in a awm thei mai ang - AAP MP; Jail thuneituten a thusawi an chhang let

Aam Aadmi Party (AAP) Rajya Sabha MP Sanjay Singh chuan Delhi excise policy scam kaihnawiha Tihar jail-a tang mek, AAP national convenor leh Delhi chief minister Arvind Kejriwal chu a hriselna dinhmun a ṭha lo hle a, hetiang renga a awm anih chuan nikhaw hre loin, 'coma' in a awm thei mai ang, a ti.

Sanjay Singh chuan Kejriwal hian a rihna, kg 8.5 vel a hloh tawh a, a blood sugar level a hniamin man a nih hnuah vawi nga zet 50 mg/dL hnuai lamah a awm tawh tih a sawi. Enkawlna ṭha tak pek a nih thuai loh chuan, nikhaw hre loa awm zui leh, a thih phah hial thei a ni tiin a sawi.

"Arvind Kejriwal hi tihhlum tumin a phiarru a ni. An man ni khan a rih zawng hi kg 70 vel a ni a, tunah chuan kg 61.5 ah a tla hniam tawh. Prime Minister Modi chu Kejriwal nunna hi infiamna atan hmang lo turin kan ngen a ni. Thil duhawm lo a thleng palh a nih chuan sorkar laipui tan insawifiah a harsa dawn hle a ni," a ti.

Tihar Jail thuneitute chuan Kejriwal hriselna dinhmun chungchanga AAP MP Singh thusawi hi nimin khan an rawn chhang ve nghal a, Kejriwal dinhmun hi uluk taka vil reng niin, damdawi lam thiamten an endik reng a ni, an ti.

Central Jail No. 2-a Office of the Superintendent chuan, Kejriwal hian ei leh in dan tur chungchanga doctor-te chawh ang pawh ṭha takin a zawm a, court thupek angin in lama siam ngei pawh pek a ni, a ti. June 2 - July 14 inkara a rihna tlakhniamna zat pawh kg 2 a nih thu an tarlang bawk.

Delhi Court-in Manish Sisodia judicial custody pawtsei

Delhi court chuan nimin khan AAP hruaitu leh Delhi deputy chief minister hlui, Manish Sisodia chu Delhi excise policy scam kaihhnawihah judicial custody hnuaiah dah a nihna chu July 22 thleng atan a pawtsei.

Nimin kha Manish Sisodia judicial custody tawp hun a ni a, court-ah video conference kaltlanga inlanin, CBI leh ED special judge, Kaveri Bawjea chuan hren a nih hun chhung hi a pawhsei sak leh a ni. April 30 khan Delhi court chuan CBI leh ED-in thubuai an siamsak chungchanga Sisodia bail dilna chu alo hnawlsak tawh bawk.