Delhi Assembly inthlan: Kejriwal-a'n thamna chungchang a sawi nawn

Delhi Assembly inthlan neih tura a campaign-naah, Aam Admi Party (AAP) hotu, Arvind Kejriwal-a chuan voter-te chu BJP leh Congress party-in thamna sum pek an tum chuan la a, vote an thlak hunah AAP vote zawk turin a lo hrilh tawh a, hei vang hian Election Commission aṭangin warning pek a ni.

EC-in warning a pek hnuah, Kejriwal-a chuan thamna sum pek chung­chang hi Thawhṭanni khan a sawichhuak leh. Jangpura leh Kasturba Nagar constituency-a rally neihnaah he thu hi a sawn nawn leh a, "BJP leh Congress-in sum an rawn ken chuan lo la rawh u. Heng party-te hian vote zawn nan blanket leh buhfai bag pawh an sem a ni. La vek ula, zu erawh chu chhungkaw tichhetu a nih avangin la suh u," a ti. Inthlan an neih tura AAP chu thlan tlin a nih chuan Delhi khawchhunga in tinah water pipeline pek a ni ang a, khawpui pumah free wi-fi facility dah a nih tur thu a sawi bawk.

Kejriwal-a chuan hmeichhiate himna chu an dah pawimawh thu sawiin, AAP-in sorkar­na a siam a nih chuan hmeichhiate chu an mobile phone-ah 'securi­ty button' pein, hemi hmang hian emergency ah pawh pawikhawihna thlenna hmun chu minute reiloteah police-te'n an thleng thei dawn a ni, a ti.

Central-a BJP kaihhruai sorkar chu beiin, a thu lo tiam tawhte sut leh ching­ah a puh a, BJP leh Congress chu electricity rate a san chhanah a puh bawk.

BJP Chief Minister candidate Kiran Bedi chuan a thil ngaih pawimawh hmasak zingah Delhi khawpui world class city-a siam a nih thu a sawi a, infrastructure leh facility tihchangtlun chu a dah pawimawh tur thu a sawi. Team Anna member hlui, Bedi-i hian January 16 khan BJP hi a zawm a, CM candidate atan ruat zui nghal a ni.

Congress vice president Rahul Gandhi pawh nimin khan South Delhi-a Kalkaji Assembly bialah a campaign a, Pradesh Congress committee Arvinder Singh Lovely nen roadshow an nei. Congress party hian January 25 leh February 5 chhung hian nasa zawka campaign an tum a, hemi chhung hian meeting 150 vel huaihawt­in campaign hi Kerala, Karnataka, Assam leh Uttarakhand chief minister-te pawhin an pui ang.