US thanga awk lo turin China in India a chah

India-in Republic Day vawi 66-na a lawmna pualin China President Xi Jinping chuan President Pranab Mukherjee hnenah lawmpuina thu a thawn. China chuan India nena an inlaichinna chu nghet zawka siam a duh thu a hrilh.

India nena inzawmna nghet zawk neih a duh thu a sawi rualin, Xi chuan India chu US thang kama awk lo tura fimkhur turin a chah nghal bawk.

US President-in a ṭum hnihna atana India a tlawh chu khawvelin a ngaihven a, hei hi khawthlang lam media tam tak chuan US hian China ṭhang chak zel tur danna tura a thawhna kawnga thawhpui nghet atana India siam a tumna ni tein an sawi. India leh China hian kawng hrang hrangah thawhdunna zau zawk siam tumin hma la mek mah se, khawthlang lam media-te chuan ramri chungchanga buaina an neihte hi an sawilang leh ṭhin a ni.

China Prime Minister Li Keqiang pawhin Prime Minister Narendra Modi chu lawmpuina thu thawnin, India leh China chuan hma sawnna turin thawhdunna ṭha tak an nei a ni, a ti. Kawng hrang hrangah thawhdunna nghet leh zau zawk neihpui turin China chu a inpeih reng a ni, a ti.