Sorkarin West Bengal tableau telh ve a remti lo

Republic Day parade-ah state hrang hrang te'n tableau hmangin state ziarang leh ropuina te an tarlang a, mipuite lawm hlawh ber zing a mi a ni. Hetihlai hian nikuma best tableau award dawngtu, West Bengal chuan kumin R-Day parade-ah hian sorkarin laipuiin an tel ve a phalsak lo niin an sawi.

West Bengal-a rorellai, Trinamool Congress MP Derek O'Brien chuan an state hian Chief Minister Mamata Banerjee-i pet project 'Kanyashree' chu West Bengal tableau theme atan hian an hmang a, mahse hei hi sorkar laipui chuan a hnawlsak a ni, a ti. State sorkarin phalsak tura a ngen leh hnu pawhin lantir ve phalsak an ni ta lo tih a sawi.

'Kanyashree' program hi West Bengal CM Banerjee-i chuan kum 2013 khan a hawng ṭan a, state sorkarin a hlawhtlinna hmuh lian tak pakhata a ngaih a ni. He program hmang hian hmeichhe naupang, kum 13-18 inkar, sorkar hriatpui school-a Class VIII-Class XII zirlaite chu kumtinin stipend Rs 500 pek an ni. He program hi khawvel huap pawhin hriat a hlawh hle a, Girl Summit 2014-ah pawh Department for International Development, UK leh UNICEF chuan presentation pe turin an lo thlang tawh bawk.