Sakhaw zalenna ngaihhlut tur a ni: US President

US President Barack Obama chuan nimin khan Delhi-ah town-hall meeting neiin, sakhaw zalenna leh inhriatthiamna chu ngaihlu a, zah turin a ngen.

Siri Fort auditorium-a ṭhalai 2,000 vel hmaa thu a sawiah, Obama chuan, "Sakhaw hming avanga inṭhendarhna a awm a nih loh chuan India hi a hlawhtling zel ang," a ti.

Prime Minister Narendra Modi-a kaihhruai sorkar chu eptu pawl hrang hrangte'n India rama Hindu sakhaw chawivul tuma puh leh, hemi kawnga firfiak taka chete pawh thunun tum loha an puh mek lai a ni. Obama chuan, "In ram Danpuia Article 25 chuan mi tupawh, eng sakhua pawh zawm turin zalenna a nei tih tarlan a ni. India leh US ah te, ramdang zawng zawngah pawh kan zalenna neihte chawinuna humhalh hi sorkar mawhphurhna a ni a, hemi rual hian mi tinte mawhphurhna a ni tel bawk," tiin a sawi.

US President hian nimin chawhnu dar 1.55 Air Force One thlawh­theihna hmangin Delhi a chhuahsan. Palam Airport aṭanga thlawk chhuakin, Saudi Arabia a pan a ni. Saudi Arabia lal thi ta, King Abdullah zahna hlanin, Saudi lal thar Salman bin Abdul-Aziz Al Saud nen meeting an nei ang a, official dangte nen zanriah an kil ho nghal ang.

Obama chuan India rama an lo lawmna avangin Prime Minister Narendra Modi leh India mipuite chungah a lawm thu a sawi.