Sipai huaisen chawimawina dawngtu firfiak nena inbeihnaah thi

Thawhṭannia Republic Day vawi 66-na lawmnaa sipai huaisen chawimawina dawngtu, Colonel Munindra Nath Rai chu chawimawina a dawn tuk, Thawh­lehni khan Kashmir-ah firfiakte nena an inbeihnaah a thi. A rual hian police pakhat kahhlum a ni bawk.

Kum 39 mi, Colonel Rai hi kum khat chhunga Kashmir biala hel nena inbeihnaa thi zinga ranking sang ber a ni. Nimin khan a thlahna Srinagar-ah neih a ni.

Colonel Rai hian mobile messaging service, WhatsApp-ah a status hnu­hnung ber, thla hnih kaltaa a post-ah chuan, 'I hun a tawp hunah pawh mite'n an fak zui theih nan che fak tlakin i hringnun hmang rawh' tiin a ziak.

Colonel Rai ruala thi police, Sanjeev Singh pawhin ni 48 kaltaa WhatsApp-a status a dahah, 'Ka hmelmate kah chu ka tihtur a ni a, pawi tihna ka nei lo. Pawi ka tihna ber chu sipai, ṭhiante leh pawisawilote nunna ka chhanhim theih lohte tan a ni' a ti.

Thawhlehni zing khan Col Rai hian intelligence hnen aṭangin Tral khuaa in pakhatah firfiak an bihruk thu a dawng a, mi 8-12 awmna, reaction team nen an pan nghal a ni. Col Rai-a team-in firfiakte bihrukna in an thlen hian he ina chengte chuan lo biain, khawchhung mite a tih chiai dawn avangin langsar taka beihpui thlak hna kalpui lo turin an lo ngen. An inbiak lai hian inchhung aṭangin firfiak pahnih rawn tlanchhuakin sipaite awmna lam hi an rawn pawng kah ta a ni. Col Rai hi a bekah an kap fuh a, damdawi-in panpui a nih hnuin a thi. Sanjeev Singh chu a hmunah a thi nghal bawk. Firfiakte hi sipaite hian an bei let ve nghal a, hun rei tak an inbeih hnuah an kaphlum ve ve.

Thawhṭannia sipai huaisen chawi­mawina, Yudh Seva Medal dawngtu mi 13 zingah Col Rai hi a naupang ber a, nikuma south Kashmir-a firfiakte nen an inbeihnaa firfiakte a kahhlum avang­in chawimawina hlan a ni. Yudh Seva Medal hi indona leh buaina hmuna sipai huaisente chawimawina sang ber a ni.

Col Rai hian a nupui leh fa pathum a thihsan. Uttar Pradesh, Ghazipur district mi a ni a, state sorkar chuan a chhungte hnena ralna cheng nuai 30 pek a nih tur thu a puang.