Delhi Assembly inthlan: Mipui ngaihdan lakah AAP sang ber

February 7-a Delhi Assembly inthlan neih tur atan political party hrang hrangte ngawrh takin an campaign zel a, ABP News-Nielsen in mipui ngaihdan a lak hnuhnung berah Arvind Kejriwal-a party, Aam Aadmi Party (AAP)-in hma a hruai.

January chawlhkar hnihnaah mipuite ngaihdan hi lak a ni a, survey hnuhnung ber, January 24 leh 25-a buatsaihah hian AAP chuan 4% in hma a sawn a, 50% chuan Kejriwal-a kaihhruai party hi vote an tum tih an sawi.

Survey hmasa aiin BJP chu 4% in a tlahniam a, BJP-a lut thar, Chief Minister candidate atana a ruat Kiran Bedi chuan voter hipluh kawngah BJP a pui rih lo niin ABP News-Nielsen chuan a tarlang.

Chief Minister duhthlan tur chung­changah, Delhi mipui zinga a tam zawk chuan midang aiin Arvind Kejriwal-a an la thlang. CM atana an duh ber an thlannaah Kejriwal-a hian 51% lai a hmu hma a, Kiran Bedi-in 40% hmuin, Congress hruaitu Ajay Maken chu 8% in an thlang.

AAP duhtu zinga a tam zawk chu Muslim, SC/ST/OBC leh mi rethei zawkte an ni a, mi hausa zingah BJP duhtu an tam ber.