Constitution Preamble version hlui hman vangin sorkar sawisel

Republic Day ni-a central-a BJP kaihhruai sorkar­in advertisement a tihchhuahah, Indian Constitution Preamble thlalak a tarlan chu a version hlui a ni a, 'socialist' leh 'secular' tih a lang tel lo. Hei vang hian sorkar laipui chuan sawisel a tawk nasa hle.

Adverstisement hi January 26 khan Information and Broadcasting Ministry chuan newspaper hrang hrangah a tichhuak a, thlalakah hian Preamble “We, the people of India, having solemnly resolved to constitute India into a Sovereign Democratic Republic.” tih inziak a lang. Mahse hei a version hlui a ni a, kum 1976 khan 42nd Amendment siam niin, “We, the people of India, having solemnly resolved to constitute India into a Sovereign Socialist Secular Democratic Republic…” tia siamṭhat a ni.

Congress party bakah activist-te chuan hemi chungchang hi sawifiah turin sorkar an phut a, a dik lo tihchhuahnaa inhnamhnawih official-te hrem turin an phut bawk.

Congress hruaitu Manish Tewari chuan 'secular' leh 'socialist' tih thu tihbo a nih chu ngaihdam theih loh pawikhawihna a ni, a ti.

Activist Kavita Krishan pawhin sorkar laipuiin advertisement a tihchhuah dan chu ram danpui tihhmelhemna a ni tiin, signature campaign a buatsaih bawk.

Union Minister of State for Information and Broadcasting Rajyavardhan Rathore chuan hemi chungchang hi sawifiahin, Constitution original-a Preamble thla hman an duh vang a ni tih a sawi a, "Constitution hman ṭan ni kan lawm a, advertisement ah pawh hemi hlimthla hi tihlan a ni," a ti.