J&K-a firfiak nena inbeihnaah sipai 4 an thi
Jammu and Kashmir-a Doda district ramhnuaia firfiakte nena an inbeihnaah sipai pali an thi a, an zingah hian major-rank officer pawh a tel.
Rashtriya Rifles leh Jammu and Kashmir Police-a Special Operations Group chuan firfiak an awm tih thu an dawn bawhzuiin, Doda hmarlama Deas forest belt-a Dhari Gote Urarbagi-ah Thawhṭanni zanah khan joint operation an nei a, firfiakte nen hian a inkap niin a tarlang. Hun rei vak lo an inkah hnuah firfiakte hi an tlanchhia a, sipaite hian umzuiin an inkap zui leh a ni. He inbeihnaah hian sipai panga chu na taka kah hliam an ni a, an zinga pali hi an thi ta niin official-te chuan an sawi. Firfiakte umzui tur hian sipai tirh luh belh nghal a ni a, beihpui thlak hna pawh chhunzawm zel a la ni. Firfiakten an kah hlum zingah hian 10RR-a major Brijesh Thappa a tel a, a ni hi tun hnai lawka kaisang a ni.
J&K lieutenant governor Manoj Sinha chuan sipai paliin nunna an chan chu pawi a tih takzet tih sawiin an chhungte a tawrhpui thu a sawi. LG Sinha chuan, "Kan sipai thite phuba hi kan la ngei dawn a, firfiakte leh an thurualpuite chu kan nuaibo dawn. Mipuite pawh firfiakte beih letna kawnga inlungrual tur leh, nuai bo an nih theihna turin information rintlak tak min hrilh zel turin ka chah a ni," a ti.
Defence minister Rajnath Singh chuan nimin zing khan COAS General Upendra Dwivedi biain, Doda-a inbeihna thleng chungchang leh an dinhmunte a zawtfiah a ni.Defence Minister chuan sipai thi chhungte a tawrhpui thu a sawi a, firfiak laka beihpui thlak hna chu kalpui chhunzawm zel niin, sipaite chuan firfiakte nuai bo a, boruak ralmuang a awmna turin an bei zel dawn a ni, a ti.
June 11 hnuaa Doda district-a inbeihna a thlen ṭum hnihna a ni a, tun hnaia helai bialah hian firfiaka chetna a hluar chho hle. Hei vang hian police leh security force-te pawhin Jammu division-a hmun hrang hrangah joint combing operation te pawh an nei a ni. July 8 khan Kathua district-a Badnot-Billawer-a inbeihna thlengah sipai panga thah anni a, panga dang an hliam bawk a ni.
Jammu and Kashmir police-te chuan Reasi district-a firfiakte tawmbuk an hmu chhuak bawk a, he hmun aṭang hian silai leh a mu eng emaw zat an hmu a, heng zingah hian AK-47 mu 30, AK-47 magazine leh HE-36 hand grenade pawh a tel.