Supreme Court-in judge thar pahnih nei

President Droupadi Murmu-in Supreme Court Collegium rawtna a pawmpui tak avangin Supreme Court chuan judge thar pahnih, justice N Kotiswar Singh leh justice R Mahadeve te a nei ta. Judge thar pahnihte ruat an nih thu nimin khan law minister Arjun Ram-a'n a puang a ni.

Judge thar pahnih a neih belh tak avangin Supreme Court chuan Chief Justice of India DY Chandrachud tela judge a neih theih zat, 34 chu a nei kim ta.

Supreme Court judge thar, justice N Kotiswar Singh hi Manipur aṭanga Supreme Court judge ni thei hmasa ber a ni a, Jammu and Kashmir and Ladakh chief justice ṭanglai a ni. Judge a nih hma hian Manipur Advocate General a ni ṭhin a, Gauhati High Court leh Manipur High Court-ah a lo thawk tawh bawk.

Justice Mahadevan hi Madras High Court-a acting chief justice a ni a, lawyer angin case 9,000 chuang a buaipui tawh a, Tamil Nadu sorkarah Additional Central Government Standing Counsel leh Madras High Court-ah Senior Panel Counsel pawh a lo ni tawh a ni.