Sorkarin Justice Rohini commission report bawhzui lo

Justice Rohini commission on the sub-categorisaton of OBC in sorkar laipuia report a thehluh aṭangin kum khat dawn a liam tawh chungin sorkar chuan report hi a la bawhzui lo.

He report hi nikum July 31 khan President Droupadi Murmu hnenah an thehlut a ni.

Sorkar chuan report a rawtna awmte chu a zirchiang dawn tih a sawi a, mahse he rawtna anga kalpui a nih chuan OBC community a nghawng nasat dawn avang leh, BJP kaihhruai NDA sorkarin beih a tawh ngei rin a nih avangin BJP lam hian an ngaihven zui ta rih lo nia ngaih a ni. BJP hian 2024 Lok Sabha inthlanah khan kum 2014 leh 2019-a OBC leh Dalit thlawpna an hmuh ṭhat ang kha an hmu pha tawh lo hle.

Minister of State for Social Justice and Empowerment, Ramdas Athawale chuan report hi cabinet meeting-ah ngaihtuah a ni dawn tih sawiin, hemi hnu hian Parliament-ah pharh a ni ang, a ti. 'Report hi nikumah ministry-ah thehluh a ni. Sorkar chuan cabinet meeting-ah a la pharh lo a, ngaihtuah a nih hun tur ka la sawi thei lo,' a ti. Report hi mipui hriat tur pawha puanzar a la ni lo bawk.