December-ah Covid-19 vaccine peihfel hman ring

Serum Institute of India (SII)-a executive director Dr Suresh Jadhav chuan kar liam ta Inrinni khan kumin December thlaah chuan Covid-19 vaccine dose maktaduai 60-70 chu peihfel hman beisei a nih thu a sawi a, mahse market-a zawrhchhuah theih hun chu nakkum March thla velah a nih a rin thu a sawi bawk.

Kar liam ta Inrinni khan HEAL Foundation leh ICCIDD ṭangkawp chuan  India Vaccine Accessibility e-summit  an buatsaih a, he hunah hian Covid-19 vaccine chungchang leh a kaihhnawih sawiho a ni. 

Vaccine dose maktaduai 60-70 chu kumin December thlaah hian peihfel hman an inrin thu Dr Suresh chuan a sawi a, mahse license engkim peihfel a nih hunah nakkum March thlaah chuan India mite hman theih turin market lama zawrh chhuah tum a nih thu Dr Suresh chuan a sawi a ni. 

Prime Minister’s Office chuan India-in Covid-19 vaccine pathum enchhin a neih mek thu a tarlang a, heng zinga pahnih chu phase 2-ah enchhinna neihpui mek a niin, pakhat chu phase 3-ah enchhinna neih a ni ve mek bawk. Vaccine chungchangah hian prime minister Narendra Modi chuan government official-te chu eng dinhmunah nge India kan din tawh tihte sawifiah turin a ti a ni.

Sorkar laipui chuan Covid-19 vaccine peihfel a nih huna a dawng hmasa tur, ngaih pawimawh hmasak turte a thlang ṭan. 

Vaccine hi frontline health leh sani­tation worker, police official-te bakah kum upa lam, natna benvawn neite hnenah pek hmasak an ni dawn nia sawi a ni. Hemi atana ruahmanna hi siam mek niin, October-November chhungin peihfel hman an tum. Vaccine dawng tura ngaih pawimawh hmasakte pual hian dose maktaduai 600 vel  mamawh a ni dawn  niin official chuan a sawi.  

Union health minister Harsh Vardhan chuan nakkum July thlaah chuan India-in vaccine dose maktaduai 500 vel a neih hman an beisei thu a lo sawi tawh a ni. Hetih lai hian India ram mipui, tluklehdingawn 1.3 chuangte hnena vaccine pek chu hna hautak tak a ni dawn a, kum 2022 thlengin buaipui chhoh a ngai dawn niin an sawi. 

Niti Aayog member VK Paul chuan kar thum liam ta chhung khan ram chhungah Covid-19 kai thar leh  hri vanga thi an tlahniam tawh tih a sawi a, hemi rual hian thlasik a rawn thlen dawn avangin hri leng thawh hnihna hi thleng leh thei reng a ni, a ti. 

Hripui leng dona kawnga hma latu, expert panel coordination chief Paul chuan kar thum chhung hri leng hian ziaawm lam a pan niin a lang a, mahse hetihlai mek hian state panga (Kerala, Karnataka, Rajasthan, Chhattisgarh leh West Bengal) leh UT 3-4 velah chuan hri kai thar punna hi a la sang chho zel thung a ni, a ti. India dinhmun chu a ṭha chho niin lang mah se, hmabak a la ko hle tih a sawi. Europe ram hrang hrangah hri leng thawh hnihna an tuar leh mek a, India-ah pawh thlasik lo thleng turah hian a thawh hnihna hi a thleng lo ang tih a sawi theih loh a ni, tiin a sawi.