EC-in Kejriwal-a warning a pe leh

Election Commission chuan Aam Aadmi Party (AAP) hruaitu, Arvind Kejriwal chu Model Code of Conduct (MoC) a bawhchhiat avangin a vawi hnihna atan warning a pe leh.

Kejriwal-a hian rally-a thu a sawiah, voter-te chu BJP leh Congress party-te'n thamna sum pek an tum chuan pawisa chu la a, vote an thlak hunah AAP vote thung turin a chah. Hemi thu hi a hma pawhin a lo sawi tawh a, EC in warning a lo pe tawh a ni. Mahse warning pek a ni chungin a sawi nawn leh a ni.

EC chuan Kejriwal chu MoC a palzut leh a nih chuan a chungah action na taka lak a ni ang, a ti.

Hetihlai hian BJP chief minister candidate Kiran Bedi chuan Kejriwal hian an party poster siamah a ṭha lo lam hawi zawnga a thlalak a hman avangin legal notice a pe bawk. Kiran Bedi hian a phalna la loin AAP hotu hian an party poster-ah a thlalak hi a hmang niin a sawi a, EC hnenah Kejriwal-a candidate nihna chu hlihsak turin BJP chuan a phut bawk.

AAP hian khawpui chhunga auto-rickshaw ah poster tarin, mipuite chu chief minsiter atana Kejriwal nge Bedi an duh zawk thlang turin an ti a, an pahnih thlalak an chuantir a ni.

Kiran Bedi hian election campaign a neihnaah US President Barack Obama hming chu campaign-na atana a hman avangin sawisel a tawk a, eptu party te chu model code of conduct palzutna a nih thu an sawi.

BJP chuan nimin kha party manifesto tlangzarhna hun atana a rua­hman a ni a, mahse BJP senior leader Anant Kumar chuan tun ṭum assembly inthlan neih turah hian an party-in manifesto hran an nei dawn lo tih a sawi a, "PM Modi leh Kiran Bedi te'n Delhi tana hmathlir an neihte tarlanna, vision document kan tichhuak zawk dawn a ni," a ti. State BJP president Satish Upadhyay chuan manifesto leh vision document-in danglamna an nei hran lo tih a sawi bawk. Hetih­lai hian BJP senior leader-te zingah state puitlinga Delhi hlankai tum chungchangah an inlungrual theih loh vangin manifesto pawh hi an siamfel thei lo nia sawi a ni thung.

Congress vice president Rahul Gandhi chuan Thawhlehni aṭang khan an party tana campaign-in roadshow a nei ṭan bawk. Rally neihnaa thu a sawiah, Rahul Gandhi chuan, "Prime Minister chuan thuneihna a chan aṭanga thla riat chhung chu amah intihlarna hun atan a hmang a, inthlan dawna a campaign-naa a thutiam zawng zawngte engmah hlen a nei lo," a ti. PM chu ama chungchang bikah chauh a buai a, an sorkar hnuah thil a taka tih an la nei lo tiin, mipuite chuan a sawi ringawt ni lo, a taka hna an thawh hun an hre duh tawh a ni, a ti.