Hazare-a'n Modi-a sorkar a bei, nawrh huaihawt a tum
Eirukna dotu, Anna Hazare chuan Prime Minister Narendra Modi-a kaihhruai sorkar chu a intiam anga rampawn lama sum chheprelh a lakkir theih loh avangin a bei a, mipuite an bumna avangin mipuite vekin zirtirna an pe dawn a ni, a ti.
Kum 77 mi Hazare chuan, "Lok Sabha inthlanpui neih dawna an campaign-naah khan BJP-in sorkarna a siam chuan lakluh a nih aṭanga ni 100 chhungin black money-te hi an lalet ang tih an tiam a, hei bakah hian sum chheprelh an lakkirte chu ram mipuite tinte account-ah cheng nuai 15 zelin an dahsak ang tih an sawi bawk. Mahse tun thleng hian Rs 15 pawh an dah lo. Mipuite chuan dawt hmanga an bumna hi an hrethiam tawh a, Congress sorkar hnena zirtirna an lo pek tawh ang khan BJP kaihhruai sorkar hnenah pawh an pe leh dawn a ni. Kum 2011-a eirukna dona beihpui neih a nih aṭang khan mipuite hi an harhchhuak tawh a ni," a ti.
Eiruk dona tur, Lokpal Act chu President-in a sign aṭanga ni 365 hnuah pawh Modi-a kaihhruai sorkar chuan a takin a la hmang lo tih sawiin Hazare chuan, "Sorkar laipui chuan eiruk chungchang hi a ngaipawimawh tak tak lo a ni," a ti. Hei vang hian sorkar nawrna atana nawrh huaihawt leh a tum thu a sawi.