Sorkarin 'Read India' campaign kalpui leh dawn

Central-a BJP kaihhruai NDA sorkarin 'Make in India' campaign a kalpui hnuah, 'Read India' campaign kalpui leh a tum a, February 14 hian he campaign bul ṭanna hi neih a ni ang.

Read India project-ah hian ram­chhungah library thar eng emaw zat hawn tum a ni a, heta ṭang hian mipuite'n lehkhabu chi hrang hrang an chhiar thei dawn a ni. Mahse a tir lamah chuan study centre hi 'Pradhan Mantri Adarsh Gram Yojana' hnuaia MP-te'n khua an thlan bikah dah hmasak phawt a ni ang.

Minister Smirti Irani kaih­hruai Human Research Development (HRD ministry chu he project enfiah hna thawk tura tih a ni. Mahse project kalpuina tur sum hi khawi aṭanga pek tur nge tih sawichian a la ni lo.

Prime Minister Narendra Modi chuan hmalakna tur hrang hrang, 'Saansad Adarsh Gram Yojana', 'Pradhan Mantri Jan Dhan Yojna', 'Swachh Bharat Mission' leh 'Good Governance Day' te a lo hawng tawh a ni. Hei bakah hian 'Saansad Adarsh Gram Yojana' hnuaiah PM chuan Parliament member zawng zawngte chu kum 2016 chhungin an bial chhunga thingtlang khaw pa­kkhat model village-a siam tur leh, kum 2019 ah khaw pahnih dang siam turin a lo ngen tawh bawk.