India-China military commander talk vawi riatna nei leh dawn
India leh China chuan ramri chungchangah buaina an neih fo chu tihziaawm a nih theihna atan military commander level inbiakna neih leh an tum.
Ram pahnih hi ramri chungchangah military commander leh diplomatic level-ah vawi sarih lai inbiakna an lo nei tawh a, tunkar chho hian a vawi riatna turin ram pahnihte hian inbiakna nei turin an inbuatsaih mek tih India media-te chuan an tarlang.
Thlasik inṭanchho mekah ram pahnihte hian kilometre 1,597 a thui ramri, Line of Actual Control (LAC)-ah sipai an dahbelh zel nia sawi a ni a, hei vang hian ram pahnihte hi an la inep ru reng nia sawi a ni. Heng boruak awm chho mek hi tihdaih a nih theih nan ram pahnihte hian a vawi riat nan military commander level-ah inbiakna neih an tum ta a ni tiin media-te chuan an tarlang a ni.
China sipai People’s Liberation Army (PLA) hian indo lirthei (armoured unit) leh artillery unit chu ramri aṭanga lakchhuah ve ve a rawt a, mahse India lam chuan heng indo lirtheite hi an lakchhuah a nih chuan anmahni beitute dinhmun a ṭhat phah dawn niin a sawi thung. "India-in indo lirthei (armoured unit) leh artillery unit a dahsawn chuan Chang La leh Marsimik La-a kan awm hmun khuarna hi kumtin April thla thlengin vur sur nasa takin a kawng a hnawh ṭhin avangin kan tan neih let a harsa tawh ang," tiin senior military commander chuan a sawi a ni.
Hetih lai hian China lam chu Marsimik La leh Kongka La aṭanga km 10 vel lekah six-lane Kashgar-Lhasa highway a awm vangin, an post thlengin kawngpuiin a pawh a, an tan harsatna a awm ve lo niin an sawi.