Union Minister hluiin Congress a chhuahsan

Environment Minister hlui, Jayanthi Natarajan chuan Congress party a chhuahsan a, party vice president Rahul Gandhi chu na takin a bei zui nghal.

Natarajan hian a banna lehkha hi nikum November thla khan Congress President Sonia Gandhi hnenah a thehlut a, mahse a chhanna engmah a dawng lo nia sawi a ni.

Minister a nih laiin Natarajan hian project lian tak tak thawhna tura green clearance a pek duh loh avangin hmasawnna hna thawhna kawng daltuah puhin sawisel a hlawh hle a, a cabinet member puite ngei pawhin an sawisel a ni.

Nimina press conference a neihah, Natarajan chuan Congress a chhuahsan thu hi a sawi a, Rahul Gandhi chu a ministry-a thutlukna siam kawnga inrawlh nasaah a puh bawk. Party dang zawm tumna a nei rih lo niin a sawi. Minister a nih lai hian Congress party chuan banna thehlut turin a ti niin a sawi bawk a, nikum Lok Sabha inthlanpui neih hma khan minister a nihna aṭangin a bang a ni.

Natarajan hi UPA hun laia mega project 35 vel tihtangkhangnaa a mawhphurtua puh a ni a, heng project investment hi pakhatah pawh cheng vaibelchhe 1,000 chuang vek an ni. October 2009-a sorkarin a thuphunga a lo pawm tawh, MW 2,800 nuclear power project pawh minister a nihna aṭanga a ban hnu ni ruk, kum 2013 December 27 khan environment clearance pek a ni chauh a ni. He project hi hun rei tak tihkhawtlai a nih vangin project thawhna man pawh hi ennawnin cheng vaibelchhe 14,500 aṭangin cheng vaibelchhe 23,502 ah tihsan a ni.

Natarajan-i'n Rahul Gandhi a beihna hi Congress party chuan rawn chhang nghalin, thu dik tawk lo a nih thu a sawi. Congress hruaitu Sanjay Nirupam chuan, 'Rahul Gandhi hian mi harsa zawkte tan theihtawpin a bei a ni. Mipuite hriatah pawh hemi chungchang hi a auchhuahpui a, Natarajan emaw, midang emaw pawhin Vedanta mines clearance pekna daltu niin sawi mah se, thu awmzia neiloah ka ngai. Rahul hian environemnt chungchang hi a vei a, hei hi minister emaw midang emaw pawh lo sawipui se thil pangngai ve mai a ni," a ti. Party hruaitu PC Chaco chuan, "Tupawhin party an bansan duh a nih chuan zalenna an nei vek a, hetianga dik lo taka midang puh kual vak hi thil pawm tlak a ni lo," a ti.