Voter hnena thamna semah Kiran Bedi puh

Delhi Assembly inthlan neih tura BJP chief minister candidate Kiran Bedi chu Nilaini khan a campaign laiin hmeichhe ṭhenkhat hnena ṭhi a sem lai hmuh a ni a, Aam Aadmi Party (AAP) chuan voter hnena thamna semah puhin model code of conduct bawh­chhiahah a puh.

Kiran Bedi hian East Delhi, Patparganj-a roadshow a neih laiin pearl ṭhi a sem a, AAP chuan na taka bei letin, "Voter te thamna atan ṭhi hi an sem a, hei hi thil ṭha lo tak a ni," a ti.

AAP chuan BJP chu campaign advertisement a siam dan chung­changah thupha chawi turin a phut bawk. BJP hian an advertisement siamah Kejriwal-a'n inthlan hmasa, kum 2013 December thlaa neih hnua sorkar siam tura Congress thlawpna a pawm avanga deuhsawhna tilangin, AAP chuan a hnung a lo zui ṭhin, Anna Hazare-a duh dante a kalsan ta niin an tarlang.

Hetihlai hian AAP hotu Arvind Kejriwal-a chu mipuite hnenah thamna pek tum an awm pawha la tur leh, vote an thlak hunah AAP vote thung tura a chah avangin Election Commission chuan vawi hnih warning a pe tawh a ni.

Nimin khan Uttar Pradesh-ah Hindu Raksh Dal (HRD) activist-te chuan Kaushambi-a AAP office hmaah nawrh huaihawtin, Arvind Kejriwal-a lim leh poster an hal. HRD founder leh national president, Bhupender Tomar chuan Kejriwal-a chu Ghaziabad-a cheng chungin New Delhi inthlanah chuh a tum a, Delhi mipuite a bum a ni, a ti. AAP leh Kejriwal-a chu Naxalite-te thurualpuiah a puh bawk.

February 7-a inthlang tur, Delhi-ah hian voter mi maktaduai 1.3 an awm a, heng zinga nuai 1.25 chu voter lem an ni.

TV channel IBN7-in survey a neihah voter lem maktaduai 1.25 an awm tih hi hriatchhuah a ni. Election Commission pawhin vote lem nei awm zat hi a pawm a, thil dik lo chu siamṭhat a nih tur thu a sawi. Mahse a tihdikna siam tur pawh hian hun rei tak a la ngai dawn a ni. IBN7 in survey a neihah hian mi pakhat voter identity card pahnih nei te, voter list-a hming chuang si a taka hmuh tur awm lo te, hming ziak dik lo te, address dik lo te an ni.