Sorkar laipuiin NITI Aayog a thuam ṭha

Prime minister Narendra Modi kaihhruai National Democratic Alliance (NDA) sorkar chuan sorkar laipuia public policy think tank, NITI Aayog a thuam ṭha. Full time member pali bakah ex-officio member leh special invitee angin union minister 15 a dah belh a, an zingah hian BJP thawhpui party aiawhte pawh an tel.

Prime Minister Modi chu chairperson a ni chhunzawm zel a, economist Suman K Berry pawh vice-chairperson a la ni dawn a ni. Sorkar chuan council of minister thlak kual a nih avangin NITI Aayog hi a thuam ṭha a ni.

ISRO DG hlui leh scientist VK Saraswat, agricultural economist Ramesh Chand, paediatrician Dr VK Paul leh economist Arvind Virmani te chu NITI Aayog full-time member an ni chhunzawm ang. Ex-officio member pali atan defence minister Rajnath Singh, home minister Amit Shah, agriculture minister Shivraj Singh Chouhan leh finance minister Nirmala Sitharaman te dah an ni. Special invitee-ah Nitin Gadkari (road transport and highways), JP Nadda (health), HD Kumaraswamy (heavy industries and steel), Jitan Ram Manjhi (micro, small and medium enterprises), Rajiv Ranjan Singh (fisheries, animal Husbandry and dairying), Virendra Kumar (social justice and empowerment), Rammohan Naidu (civil aviation), Jual Oram (tribal affairs), Annpurna Devi (women and child development), Chirag Paswan (food processing industries) leh Rao Inderjit Singh (statistics and programme implementation) te dah an ni bawk.

National Institution for Transforming India, NITI Aayog tia hriat lar zawk hi kum 2015 khan PM Modi kaihhruaiin kum 65 zet kalpui tawh, Planning Commission thlakna tura a din a ni. NITI Aayog council-ah hian state tin chief minister-te bakah, Delhi leh Puducherry chief minister leh UT-a lieutenant governor-te an tel.