AP CM-in union budget-ah an state tan sum dah tam a phut

Andhra Pradesh chief minister N Chandrababu Naidu chuan Thawhlehni zan khan union home minister Amit Shah a hmu a, union budget pharh turah an state tana sum tam zawk dahsak turin a phut. Naidu hian nimin khan finance minister Nirmala Sitharaman a hmu leh bawk.

Telugu Desam Party (TDP) president hian kum 2014-a felhlel taka Andhra Pradesh ṭhen a nih chu tun thlengin a nghawng an la tuar tih a sawi a, an state-a sorkar chu ro an rel ṭha lo hle tih a sawi. Andhra Pradesh sorkar data-a a lan danin, an state sum dinhmun hi a ṭha lo hle. An leiba hi 2019-20-a Gross State Domestic Product (GSDP)-a 31.02% aṭangin 2023-24 ah 33.32% in a pung tawh a ni.

Janata Dal United, JD(U) national working president Sanjay Kumar Jha pawhin Thawhṭanni khan Union Finance Minister hi hmuin, union budget tharah Bihar state tan sum tam zawk dah turin a lo phut ve tawh bawk.

Lok Sabha inthlanpui neih zawh takah BJP in party mala sorkarna siam khawp MP a neih tlin tak loh avangin NDA hnuaia party lian pahnih, TDP leh JD(U) te hi an dinhmun a pawimawh ta hle a ni. NDA sorkar atana an pawimawhna te hriain, an state hamṭhatna tur pawhin an nawr ngam hle rin a ni. Naidu hian a hmaa Delhi a tlawh ṭum pawhin Shah leh union minister dangte a lo hmu tawh a, an state dinhmunte a lo sawipui tawh bawk a ni.