Mumbai airport-ah loader hna diltu 25,000 chuang pungkhawm

Mumbai airport-ah Thawhlehni khan airport loader lakna tura Air India Airport Services Ltd recruitment drive neihah hna diltu inlan an tam lutuk a, innek buai palh a thlen hlauhthawnawm khawpin an awm.

Airport loader lak tur hi Rs 20,000 - 25,000 hlawh tur an ni a, overtime allowance te nen chuan thla khatah hian Rs 30,000 chuang an hlawh thei a ni. Hna ruak hi 2,216 awmin, a diltu hi 25,000 an chuang a ni. Diltu an tam avangin walk-in interview nei tur pawhin an nghah rei a ngai hle a, tam tak chuan darkar eng emaw zat thil ei mumal loin an nghak a ni.

Airport loader hi aircraft-a bungrua load leh unload hna bakah, baggage belts leh ramp tractor-te an enkawl a, aircraft pakhat hian an bungrua leh ei tur supply vel buaipui turin loader hi a tlem berah panga tal an mamawh ṭhin. Thawhṭanni pawh khan Gujarat-a Bharuch district-a Ankeshwar-a private firm-in thawktu mi 10 a lakna turah pawh diltu mi 1,800 zet an awm a, office panna kawngah an innek nasa hle. An inneknaah hian railing pawh a chim phah a, mahse hliam na erawh an awm lo hlauh a ni.

Ram chhungah hna nei lo an pun zel avangin hna ruak diltu an tam chho zel. Airport loader dil thei pawh hi Class X pass chin tih a nih laiin, diltu zingah hian master degree nei pawh tam tak an tel.