J&K-a Doha-ah VDG leh firfiakte an inkap leh

Jammu and Kashmir-a Doha district-a Thawhṭanni zana firfiakte leh sipaite inkahna avanga sipai paliin nunna an chan hnuah, nimin khan firfiakte leh Village Defence Group (VDG) member-te an inkap leh.

Official-te chuan Dessa area-a Malan khuaah nimin zing khan inkahna hi a thleng leh niin an sawi, thi leh hliam erawh report an awm lo.

Sipaite nena an inkah hnua firfiak tlanchhiate zawn hna hi Desa ramhnuaiah thawh chhunzawm zel a ni a, nimin zing dar 2 vel khan VDG member-te hian Panchan Bhata bula firfiakte chetla hi hmuin an inkap a ni. Mahse khua a thim avangin duh angin an che thei lo a, heihi remchangah hmangin firfiakte hi an bibo leh hman niin an sawi.

Jammu and Kashmir-ah hian firfiak leh security force-te inbeihna a thleng fo a, kum thum chhungin firfiakte nen an inbeihnaah security force mi leh sa 119 an thi tawh. Heng inbeihna thleng zinga 40% chuang hi Jammu division chhunga thleng a ni. J&K-ah hian venhim hna thawk tur hian Army bakah Central Reserve Police Force (CRPF) sipai 60,000 vel dah an ni.