India ram hmun hrang hrangah International Yoga Day hman a ni Yoga hian sakhuana nen inzawmna a nei lo : Modi

Nimin khan India ram hmun hrang hrangah International Yoga Day vawi hnihna lawm a ni. Yoga Day hi cabinet ministers Rajnath Singh, Arun Jaitley, Smriti Irani leh Manohar Parrikar bakah minster eng emaw zat chuan hmun hrang hrangah an hmanpui.

Prime Minister Narendra Modi chuan Capitol Complex Chandigarh-ah Interna-tional Yoga Day hawnna hun a hmang a, kal khawm 30,000 te hmaah thu sawiin, Yoga chu sakhuanna nena inzawmna nei lo a ni a ti. Modi hi New Delhi-ah a let leh nghal. Foreign Minister Sushma Swaraj chuan International Yoga Day chu khawvel ram 191 zetah lawm a ni a ti. President Pranab Mukherjee chuan yoga day fest hawnna Rashtrapati Bhavan-ah a nei ve bawk.

Prime Minister Narendra Modi chuan Yoga chu mihring hriselna atana a ṭangkai thu sawiin, sakhuana nena inzawmna nei anga an sawi chu thu dik lo a ni a ti. Capitol Complex-a lawmna hun hmanah hian 'Common Yoga Protocol' leh yoga 'asanas' buatsaih a telpui a ni. Yoga 'asanas'-a tel tur hian Chandigarh, Punjab leh Haryana aṭangtein kum upa zawk mi ṭhahnem tak an kal khawm a, kawr pawl leh sen hain he hun hi hlim takin an hmang a ni. Modi chuan, "Yoga trainer te chu an hna
ṭhahnem ngai taka thawk turin a fuih a, yoga day chu lawm zel a ni ang a a ti. Yago chu diabetes tana a ṭhat thu uar takin a sawi bawk.

He tih lai hian world record siam turin raipuar 2,000 te chuan Rajkot, Gujarat-ah International Yoga Day hi an hmang. Chief Minister Anandiben Patel, Governor OP Kohli leh mi pawimawh eng emaw zatin a lawmna pui ber GMDC ground Ahmedabad-ah an hmanpui. Gujarat hmun hrang hrangah International Yoga Day hmang hian mipui 40,000 vel an pungkhawm a ni. Rajkot-ah chuan raipuar 2,000 te chu pungkhawmin yoga day-ah hian world record siamin an pung-khawm a, naupang 8,000 an pungkhawm bawk.

Union Minister Smriti Irani chuan Bhopal-ah Yoga day hi a hmanpui a, Prime Minister Narendra Modi chu ram chhungah Yoga chu nasa zawka kalpui turin a ngen tur thu a sawi. Irani chuan Madhya Pradesh sorkar chu he ni hlawtling taka a buatsaih avangin lawmthu a hrilh. State Home minister Babulal Gaur, Union Steel and Mines Minister Narendra Singh Tomar leh Union Minister of State for Textiles Santosh Gangwar bakah mi pawimawh dang ten an hmanpui a ni.