PM Modi-an China president hmuh a tum

Seoul-a ni hnih awh tur Nuclear Suppliers Group (NSG) meeting neih hunah India chu NSG member a nih leh nih loh chungchang chu an agenda tur a nih loh thu China-in a sawi hnuah, Prime Minister Narendra Modi chuan China president Xi Jinping amah ngeiin a hmuh tur thu a sawi.

Nimin khan Chandigarh-ah International Yoga Day hman a ni a, he hun hi Modi chuan hmanpuiin, India-in NSG member ni tura a beih mekna te a sawi chhuak a, China thlawpna a hmuh theih nan Shanghai Cooperation Organisation meeting, Tashkent-a neih turah kal a tum thu sawiin, Chinese President Xi Jinping chu a hmuh tur thu a sawi a ni. Modi chuan NSG member nih chungchangah hian, Foreign Secretary S. Jaishankar chuan Chinese Foreign Minister Wang Yi chu Beijing-ah a dawr tawh tih sawiin, China hian NSG member ni tura India beihna a dodal a nih chuan Asian ram te a dodalah ka ngai a, India chu khawvela ram ropui berte zinga mi a ni reng tho ang a ti.

Thawhṭanni khan External Affairs Minister Sushma Swaraj chuan media te hmaah he mi chungchang hi sawichhuakin, India chuan Nuclear Suppliers Group member ni tur hian beiseina sang tak a nei a ni a ti a, China chuan dodal mah se a beidawng mai dawn lo a ni a ti. US chuan NSG member ni tur hian India chu a thlawp tih a lo sawi tawh a, US President Barack Obama leh Secretary of State John Kerry te chuan NSG member ram 48 te chu India thlawp tur hian an lo ngen tawh bawk.

Swaraj chuan NSG member ram 23-a Foreign Minister te chu India thlawp tur hian kan ngen tawh a, US, Switzerland leh Mexico te chuan Prime Minister Modi hnenah India an thlawp tur thu an hrilh tawh a ni a ti. NSG member ni tur hian India chu a beiseiawm a ti bawk.