NEET-UG paper leak case-ah AIIMS-Patna zirlai pathum hreng

Central Bureau of Investigation (CBI) chuan NEET-UG paper leak case kaihhnawihah thu zawhfiah turin All-India Institute of Medical Sciences (AIIMS) Patna zirlai pathum an hreng.

Federal agency chuan medical zirlai pathumte mobile phone leh laptop-te pawh an laksak a ni. Heng zirlaite hi 2021 batch an ni a, Nilaini zan khan thu zawhfiah tur hian an hostel aṭangin lak an ni a, an room pawh kalhsak nghal vek a ni bawk.

Hemi hma hian paper leak kaihhnawihah hian a mawhphurtu ber zinga puh, Pankaj Kumar, Patna leh Raju Singh, Hazaribagh (Jharkhand) te chu thu zawhfiah an lo ni tawh bawk. AIIMS-Patna zirlaite hi paper putrua inhnamhnawihna neite nen an inbe pawp nia sawi an ni.

NEET-UG paper leak kaihhnawihah hian CBI chuan state pasarih aṭangin mi 42 an man tawh.

Supreme Court bench chuan nimin khan NEET-UG 2024 exam chungchanga thil fel tawk lo awm leh, exam neih tawh cancel a, exam ṭhat buatsaih tura ngenna luhtte a ngaihtuah. Petition hi 40 chuang zet a lut a ni. Chief Jutice of India Chandrachud chuan candidate ṭhenkhatin exam ṭhat leh an duh vang ringawtin tih chi a ni lo a, paper leak chuan exam pumpui a nghawng buai vek tih finfiahna a awm loh chuan cancel ngawt chi a nih loh thu petition thehlutte aiawhtu, senior advocate Narendra Hooda a hrilh. Exam cancel hian zirlai nuai 23 chuang a nghawng dawn a, hei vang hian a tawpkhawkah lo chuan cancel tura thutlukna hi siam mai chi ani lo tiin CJI kaihhruai bench chuan a sawi.