Karnataka sorkarin job reservation bill a ennawn dawn

Karnataka cabinet-in job reservatoin bill a pawm chu industry lam aṭanga sawiselna a nasat avangin an ennawn leh dawn.

Chief minister Siddaramaiah chuan bill hi ennawn lehin, ni reilote hnuah thutlukna siam a ni ang, a ti. Hei vang hian cabinet-in private sector organisation, industry leh enpterprise-a hna lakna tura reservation a siam chu tihtawp lailawk rih a ni tih a sawi a ni.

State cabinet meeting chuan Thawhṭanni khan 'Karnataka State Employment of Local Candidates in the Industries, Factories and Other Establishments Bill, 2024' hi a pass a ni. He bill-ah hian industry, factory leh sumdawnna hmun danga hna laknaa, management category-ah tualchhung mi tan 50% dahin, non-management category-ah 70% dah turin a ti a ni. Candidate chuan a secondary school certificate-ah language-ah Kannada a neih tel loh chuan, Kannada proficiency test a nei leh phawt tur a ni tih a ni bawk.

He bill hi industry hruaitu lamin an sawisel nasa hle a, hetianga tualchhung mi tana reservation sang taka an siam a nih chuan,hnathawktu tur talent nei ṭha leh mi thiam tak tak an chan fo dawn niin an sawi.

Haryana sorkar pawhin private sector-a hna lak turah state chhunga khawsa nghette tan 75% hauhsakna tur bill a lo siam tawh a, mahse nikum November 17 khan he bill hi Punjab and Haryana High Court chuan a hnawlsak a ni.