Chhattisgarh-ah Naxal-te bomb tihpuahah STS sipai 2 an thi

Chattisgarh-a Bijapur district-ah Nilaini khan Naxal helten improvised explosive device (IED) an tipuak a, Special Task Force (STF) sipai pahnih an thi a, mi dang pali an hliam.

He pawikhawihna thlenna hmun hi Tarream area niin, security force joint team hian Bijapur-Sukma-Dantewada district inrina ramhnuaiah Naxal mi leh sa an awm tih thu an dawn bawhzuiin an lakah beihpui thlak turin an kal a, an kir lamah beih hi an tawk a ni. Naxal hel laka beihpui thlaknaah hian state police hnuaia STF leh District Reserve Guard bakah, Central Reserve Police Force (CRPF) leh an hnuaia Commando Battalion for Resolute Action (CoBRA) an tel a ni.

Helhoin an beihnaa STF sipai pahnih thite hi Constable Bharat Lal Sahu leh Constable Satyer Singh Kange te an ni. Hliam tuarte hi Bijapur aṭangin Jagdalpur medical college hospital panpui nghal an ni bawk.

Chief minister Vishnu Deo Sai chuan helho pawikawihna thlen chu a dem thu leh, sipaite thihna chu a thlawn dawn lo tih a sawi a, Naxal helte nuaibo an nih hma chuan an bei zel dawn tih a sawi.

Chhattisgarh-ah hian kumi chhungin security force-ten Naxal hel 139 an kap hlum tawh a ni.

J&K-ah sipai leh firfiakte inkap lehJammu and Kahsmir-a Doha district-ah nimin khan firfiak leh sipaite an inkap leh a, sipai pahnih an hliam.

An inkahna hmun hi Kastigarh area-a Jaddan Bata khuaah niin, firfiakte hian sipaiten beihpui an thlak meknaah temporary camp atana a hman, sorkar sikul chu zing dar 2 velah an kap niin official-te chuan an sawi. Sipaite hian kap let ve nghalin, darkar khat chuang an inkap a ni.