Ni khatah hri kai hmuh chhuah thar Mi 83,883 an awm

India ramah Covid-19 lengin zual lam a la pan zel a, August 4 aṭang khan ni khata hri kai hmuh chhuah thar tam ber ni a thleng deuh reng. 

Nilaini khan hri kai thar 83,883 hmuh belh leh niin, ni khata hri kai hmuh chhuah tam ber ni a thleng leh. Ram pumah hri kai hmuh tawh hi 38,53,406 an tling tawh a, khawvela hri kai tam ber dawttu ram, Brazil-a hri kai awm zat chu India aiin nuai 1.5 vel chauhin an tam tawh a ni.  

Hri kai hmuh chhuah tam ber ni hian enkawl dam mi 68,584 an awm bawk a, ni khata hri kai dam tam ber ni a ni bawk. Hri kai hmuh tawh zingah nuai 29 chuang chu enkawl dam an ni tawh a, recovery rate hi 77.09 % a tling. Hri kai zinga 29,70,493 chu enkawl dam an ni tawh a, kai mek hi 8,15,538 an la awm. 

Covid-19 vanga thi hi Nilaini khan mi 1,043 an awm belh leh bawk a, he hripui thihpui hi ram pumah mi 67,376 an awm tawh. Union health ministry chuan India rama hripui thihpui zat chu khawvel huap ngaihtuahin a la hniam hle tih a sawi. 

Khawvel pumah hripui thihpui rate hi  3.3%  a nih laiin India-ah chuan 1.76%  a ni, a ti. Khawvel huapa mi maktaduai khat zelah hripui vanga thi mi 110 awm anga chhut a nih laiin, India ram bikah chuan he hri thihpui hi mi maktaduai khatah mi 48 ang a nih thu a sawi. 

Indian Council of Medical Research (ICMR) chuan Nilaini khan sample 11,72,179 test a nih thu sawiin, hei hi ni khata test neih tam ber ṭum a ni bawk. Ni thum chhung a zawnin ni khatah sample nuai 10 chuang test a ni tawh. Ram puma test neih tawh hi 4,55,09,380 a tling tawh a ni. 

'Test,Track and Treat' hmanga hmalakna hnuaiah hri darh zel tur venna leh hri kaite enkawl ran an nih theihna atan test tam zawk neih chhoh mek a ni a, hei hian awmzia a nei hle niin an sawi. 

Hri kai dam chak leh thihpui tlem chhan pawh nia ngaih a ni. July thla aṭang khan hri kai hmuh thar aiin enkawl dam zawk ṭum hi ṭum li a thleng tawh a ni. 

Health ministry chuan India ram puma hri kai hmuh tawh, mi 38,53,406 zinga a zahve aia tam, 54% chu kum 14-44 inkar an nih thu a sawi. 

Hetih lai hian hri kai thihpui zingah kum 60 leh a chunglam an tam ber thung a, 51% an tling. Kum 18-25 inkar zingah hri kai hi 14% awmin thihpui 1% an awm. Kum 17 hnuai lam hri kai hi 8% an awm a, thihpui hi 1% an awm bawk.