Uttar Pradesh-a rel chesualah mi 4 an thi: Eptu party-ten rel himna lam ngaihthahah sorkar puh

Uttar Pradesh-ah khualzin phur rel, Chandigarh-Dibrugarh Express a chesual a, mi pali an thi a, hliam tuar mi 31 an awm bawk.

Rel chetsualna hmun hi state khawpui, Lucknow aṭanga km 150 vela hla, Motiganj leh Jhilahi rel station inkar, Gonda-Gorakhpur section-ah niin, Ningani tlaia chesual a ni. Rel pindan 21 zinga pindan paruk a let a ni. Chetsualna hmunah hian mi pahnih an thi nghal a, hliam tuarte hi Gonda district hospital-a hruai an nih hnuah an zinga pahnih chu an hliam tuar loin an boral zui ve leh a ni.

Eptu party hrang hrangte chuan rel chetsualna a thlen leh hnu hian prime minister Narendra Modi kaihhruai sorkar chu rel himna lam ngaihtuah ṭha tawk loah an puh. Congress party president Mallikarjun Kharge chuan PM Modi leh a railway minister-te chuan Indian Railways-a safety measure ṭhat tawk loh chungchangah mawhphurtu la turin a phut tih a sawi. Thla liam taah pawh bungraw phur rel pahnih insut vangin mi 11 an thi tih a sawi a, Commissioner of Railway Safety pawhin he thilah hian chetsualna hi thleng awm reng niin a lo sawi tawh a ni, a ti. An chhuinaah pawh automatic signal a ṭha lo a, thil dang hrang hrangah fel tawk lo a awm a, safety equipment pawimawh walkie-talkie pawh a awm lo tih hmuh chhuah a nih thu a sawi.

West Bengal chief minister leh Trinamool Congress president, Mamata Banerjee pawhin rel chetsualna thleng fo chungchangah railway thuneitute leh sorkar laipui lam chu zawhna zawtin, khualzinte himna chu a pawimawh ber a, sorkar chuan hei hi engtikah nge a hriatchhuah ang tiin a sawi.

Samajwadi Party president Akhilesh Yadav pawhin chetsualna thlenga mawhphurtute chu hrem an ni ngei tur a ni, a ti bawk.

CPI general secretary, D. Raja chuan rel chestualna thleng fo chuan rel infrastructure leh a enkawlna lam a ṭha tawk lo tih a tilang a ni tiin, Prime Minister Modi chuan Vandhe Bharat train leh bullet train chungchang chhuang takin a sawi ṭhin a, mahse rel kawng erawh ngaihthah a ni thung niin a sawi.