UPSC-in Puja Khedkar lakah FIR thehlut

Union Public Service Commission (UPSC) chuan nimin khan probationary IAS officer Puja Khedkar chu civil sevices examination-ah dik lo taka thil tiah puhin a lakah FIR a thehlut.

UPSC hian FIR a theh luh bakah, Khedkar hi show cause notice (SCN) pe bawkin, IAS officer a tlinna hnawlsak a nih lohna tur chhan sawifiah turin a hriattir bawk. A insawifiah lo emaw, a insawifiahna pawmsak a nih loh emaw chuan Civil Services Exam -2022 candidate a nihna chu hnawlsak a ni ang. Hei bakah UPSC examination leh selection dangah a inlan khapsak zui a ni dawn bawk a ni.

Kum 32 mi, Khedkar hi UPSC 2022 examination buatsaihah dik lo taka disability certificate leh OBC certificate hmangin IAS-ah a tling nia puh a ni a, hei bakah Pune Collector a nih laiin a thuneihna dik lo taka hmang leh inlulinga puh a ni bawk. Nilaini khan a nu, Manorama Khedkar chu kum 2021-a loneitute ram neihsak tuma silaia tina a vau avangin police-ten manin, police custody-ah a awm mek bawk.

UPSC chuan Puja Khedkar chungchang hi uluk takin a chhui chiang mek a, Civil Services Examination-2022 atan hian a hming hi thlakin, a nu leh pa hming, a thlalak/signature, email number leh address thlengin a thlak tih an tarlang.

Maharashtra sorkar pawhin Puja Khedkar in a thuneihna a hmang sual tih leh, UPSC candidate a nihnaah thil dik tawk loin a ti nia puhna a chhuina report chu sorkar laipuiah a thehlut tawh bawk. Additional Chief Secretary Nitin Garade kaihhruaiin General Adminstration Department chuan kar khat chhung a chhui hna hi an thawk a ni.

Puja Khedkar hi an puhna hrang hrangah a ti dik lo ngei a nih tih hmuh chhuah anih chuan a hna aṭang hian ban a nih bakah, criminal case pawh siamsak theih a ni dawn a ni. Tunah hian an training lai pawh chawlh lailawk tir a ni bawk.