Parliament Monsoon Session-ah bill thar paruk pharh dawn

20th July, 2024

Parliament Monsoon Session chu July 22-ah ṭan a ni dawn a, August 12 thleng a awh ang. Lok Sabha Secretariat-in session-a bill pharh tur list a ti chhuak tawh a, bill paruk pharh a ni dawn.

Parliament-a bill pharh tur zingah hian Disaster Management Law siamṭhatna tur bill bakah Finance Bill pawh a tel. Hei bakah sorkarin list a siamah Aircrarft Act of 1934 thlakna tur Bhartiya Vayuyan Vidheyak, 2024 pawh a tel a ni.

Lok Sabha speaker Om Birla chuan Parliamentary agenda chungchanga thutlukna siamtu tur, Business Advisory Committee (BAC) a din bawk. He committee-ah hian Sudip Bandyopadhyay (Trinamool Congress), P. P. Chaudhary (BJP), Lavu Sri Krishna Devarayalu (Telugu Desam Party), Nishikant Dubey (BJP), Gaurav Gogoi (Congress), Sanjay Jaiswal (BJP), Dileshwar Kamait (JD-U), Bhartruhari Mahtab (BJP), Dayanidhi Maran (DMK), Baijayant Panda (BJP), Arvind Sawant (Shiv Sena-UBT), Kodikunnil Suresh (Congress), Anurag Thakur (BJP) leh Lalji Verma (SP) te chu member atan ruat an ni.