JD(U), RJD, YSRCP, BJD-ten Bihar, AP leh Odisha tan special status phut

Parliament Monsoon Session ṭan hma ni, nimina sorkarin all party meeting a buatsaihah JD(U), RJD, YSRCP leh BJD te chu Bihar, Andhra Pradesh leh Odisha tana special category status pek an phut thu an sawi. Meeting-ah hian union minister leh eptu MP eng emaw zat an tel a ni.

JD(U) hruaitu Sanjay Jha chuan, "Bihar tan special category status hi hun rei tak aṭangin kan phut tawh a ni. Hemi chungchangah hian harsatna a awm a nih chuan special package tal min pe tur a ni," a ti.

YSRCP hruaitu, Vijay Rai Reddy pawhin Andhra Pradesh state tan hmasawnna tur chuan special category status an pek hi a ngai tih a sawi a, state-a rorellai, TDP chuan hemi chungchangah BJP nen an inthurual avangin aw an chhuah duh lo a, hei vang hian an party chuan an sawi chhuak tih a sawi. Nilaini hian CM hlui, Jagan Mohan Reddy chuan an state dinhmun ṭhat loh zia lantirin Delhi-ah nawrh huaihawt a tum thu a sawi bawk.

Odisha tana special category status an phut chungchang chu BJP leader Sasmit Patra pawhin sawi bawkin, sorkar laipui chuan hei hi a ngaihtuah a hun tawh a ni, a ti.

Sorkar laipui chuan tihdan phung angin, Parliament session ṭan hma niah all-party meeting hi a ko a, political party hrang hrang hruaitute an tel a ni. Parliament Monsoon Session hi vawiin aṭangin ṭan a ni dawn a, vawiin hian union finance minister Nirmala Sitharaman chuan Economic Survey a pharh ang a, naktukah union budget a pharh ang. Session chhung hian rorel inkhawm ṭum 19 neiin, August 12-ah a tawp dawn a ni.