Bangladesh aṭangin Indian zirlaite hruai haw

Bangladesh-a university zirlaite nawrh huaihawt vanga tualchhung buaina chhuak chuan ziaawm lam a la pan lo a, hei vang hian Bangladesh-a India mi zirlai awm zinga mi 978 chu hruai haw an ni tawh niin Ministry of External Affairs (MEA) chuan a tarlang.

Bangladesh-ah hian India zirlai 8,000 vel an awm a, heng zirlaite himna tur hian Dhaka-a High Commisison leh Assistant High Commissions-a official-te chuan theih angin hma an lan reng a ni. Nawrh huaihawt vang hian Bangladesh sorkar chuan zirna-inte a khar tawh bawk.

MEA chuan India official-te hian India zirlaite bakah Bhutan leh Nepal aṭanga kal zirlaite chu Bangladesh an chhuahsanna kawngah an pui bawk tih a sawi. Nepal ministry of foreign affairs chuan Nepal zirlai 800 chu thlawhtheihna leh motor hmangin hruai chhuah an ni tawh tih a tarlang ve bawk a ni.

Official-te chuan Bangladesh-a la awm, Indian zirlaite chu biakpawh reng an ni tih sawiin, university khar a nih avangin heng hmuna zirlai tangkhang hi mi 4,000 chuang an la awm niin an sawi. Tualchhung thuneitute nen pawh an inbepawp reng tih an sawi a, zirlai hruai hawna tur airline company-te nen pawh an thawk ho reng tih an sawi bawk. Motor hmanga haw tur tan pawh security escort ruahman vek an ni, an ti. Bangladesh-ah hian mobile internet pawh tihtawp chhunzawm zel a la ni.