Army chief-in J&K-ah high level security meeting nei

Army Chief General Upendra Dwivedi chuan Inrinni liam ta khan Jammu-ah security official-te chu high-level meeting a neihpui a, tun hnaia Jammu and Kashmir-a firfiakte chetna hluar chho zel beih let dan turte an sawi ho.

Gen Dwivedi hian Raj Bhavan-ah Northern and Western Command, J&K Police, BSF leh CRPF official-te a hmu a ni. Commander-te hian firfiakte beih let an nih dan leh, venhimna kalpuina tura an inbuatsaih dante a hrilh bawk.

Kuminah hian J&K, a bikin Jammu division-ah security force-te beihna a thleng fo a; Kathua, Reasi leh Doda-a firfiakte nena an inbeihnaah security force mi lah sa 11 in nunna an chan tawh a, thi zingah hian Army Captain pawh a tel. Heng inbeihna thlenna hmunte hi 2020 thleng kha chuan firfiakte awm lohna leh an chet lak ngai lohna hmun nia sawi an ni ṭhin. Firfiakte pawikhawihna avang hian sipaite bakah civil mi 10 thi tawhin, hliam tuar 55 an awm tawh bawk. Thla 32 chhungin J&K-ah hian sipai 48 an thi tawh.

Doda district-ah firfiak laka beihpui thlakna chu ngawrh taka kalpui chhunzawm zel a la ni a, kar liam ta chhung khan sipai 3,000 vel tirh luh an ni a, an zingah hian special force mi leh sa 400-500 an tel a ni.

Army chief Gen Dwivedi hian Chief Army Staff charge hi June 30 khan a la a, charge a lak hnuah J&K hi ṭum hnih a tlawh tawh.