India-in tum khatah satellite 20 kap chhuak

India chuan kum 2008-a ṭum khata satellite pariat a lo kah chhuah tawh record chu khum lehin, satellite 20 zet ṭum khatah a kap chhuak leh ta.

Indian Space Research Organisation (ISRO) chuan minute 26 chhungin satellite 20 hi nimin khan a kapchhuak. Heng Cartosat-2 Series Satellite leh onboard PSLV C-34 te hi Sriharikota aṭanga kahchhuah an ni. PSLV rocket hi metre 44.4-a sei niin, tonne 320-a rit a ni a, zing dar kua leh minute 26 khan kahchhuah a ni. Satellite 20 te rih zawng belhkhawm hi kg 1,288 zet a ni. Cartosat-2 series satellite hi kg 725.5-a rit a ni a, a hmaa a lo kah chhuah tawh Cartosat-2, 2A leh 2B te nen inanna tam tak a nei.

Cartosat satellite hian van sang aṭangin thla a la ang a, chu chu leiah a thawn dawn a ni. Heng thlalak te hi cartographic, khawpui, thingtlang, tuipui kam ram hman dan te, tui insem darh dan leh application dangah te a ṭangkai hle tura ngaih a ni. ISRO-in a tarlan dan chuan, satellite kah chhuah tak te chu Google company-in a hman SkySat Gen2-1 te nen intluk tawk vuai tura ngaih a ni.

PSLV rocket hian Canada siam M3MS a keng tel a, hei hi Defence Research and Development Canada leh Canadian Space Agency ten an siam a ni. Heng bakah hian foreign satellite LAPSN-A3 (Indonesia), BIROS (Germany) leh GHGSat-D (Canada) te a phur tel. Tun hi ṭum khata ISRO-in rocket pakhata satellite 10 chuang a kah chhuah vawi khatna a ni. Kum 2008 khan PSLV rocket kap chhuakin, he rocket hian satellite 10 a keng tel. India hian foreign satellite 57 zet chu hlawhtling takin a lo kapchhuak tawh a ni. Kum 1963 khan India chuan rocket hmasa ber Thumba Equatorial Rocket Launching Station (TERLS) aṭangin a kap chhuak a ni.

Prime Minister Modi chuan Insta-gram-ah Indian Space Research Organisation te hlawhtlinna a lawmpui thu a tarlang. Modi chuan, "ISRO-a scientist te hnathawh hi a ropui tak zet a, ṭum khata satellite 20 kahchhuah hi a namailo hle a, an thawhrimna a fakawm tak zet a, he record hi an la khum leh ngei ang" a ti. India chuan science & technology lamah nasa takin hma a sawn a, hei hian hmasawnna kawngah rah ṭha a chhuah mek zel a ni a ti bawk. Satellite kahchhuah a nih theih nan Pune leh Chennai University zirlaite hnathawh chuan min tiphur hle a ni, tiin Modi chuan a sawi.