Bihar leh Uttar Pradesh-ah ṭêkin mi 77 a deng hlum

Bihar-a disaster manage-ment department-in nimina a tarlan danin Thawhlehni khan Bihar hmun hrang hranga ṭêk tla avangin mi 56-in nunna an chan, Uttar Pradesh-ah pawh mi 20 chuang an thi.

Bihar-a ṭekin a den hlum tam zawk hi thingtlanga cheng te an ni a, report a awm belh zel avangin thi zat hi an la pun belh theih thu Disaster management minister Chandrashekhar chuan a sawi. Thawhlehni khan thlipui leh ruah nasa tak chuan Bihar hi a nuai a, a tirah thi zat chhinchhiah chu 42 an ni a, an pun belh zel a, hriat theih chinah hliam tuar mi 24 an awm a ni tih Principal Secretary of Disaster management Vyas Ji chuan a ti. Hliam tur mi pariat te hi Pant- a mi te an ni a, midang pali te chuan nunna an chan bawk.

Sahrsa, Purnia leh Katihar district-ah chuan nuna chan hi mi 10 an awm a, Samastipur-ah pawh naupang pahnih an thi bawk. Arrah-ah chuan thliin chenna in eng emaw zat a tihchhiat bakah mi pahnih an thi. Rohtas district-ah chuan hliam tuar mi pariat an awm a, an zingah hian zirlai pawh telin, Kaimoor district huam chhungah pawh mi pariatin hliam an tuar a ni.

Purnia district-ah chuan ruah tla zat hi mm 83.7 a tling phak a, chhiatna thlen nasatna hmun Patna-ah chuan mm 17.2 tlain, Gaya leh Bhagalpur-ah te ruahsur avang hian nunphung a buai phah a ni.

South Bihar-ah chuan ruah hi a la sur chhunzawm rin a ni a, North Bihar-ah pawh monsoon season a inṭan chhoh mek avangin ruah hi sur mai thei dinhmunah a ding tih Director State Meteorological Department chuan a tarlang.

Indian Meteorological Department pawhin, Supaul, Araria, Kishanganj, Saharsa, Madhepura, Siwan, Saran leh Gopal ganj district te chu inralring lawk turin a hriattir a ni. State sorkar chuan hriattirna chhuahin, mipuite chu fimkhur turin a chah a, disaster manage-ment department leh district thuneitute chu inralring turin a ti bawk. Chhiatna thleng avanga thi te hnenah hian state sorkar chuan cheng nuai li
ṭheuh a pek tur thu a puang a ni.

Thawhlehni tlaia ṭek tla avang hian hliam tuar eng emaw zat an awm a, Uttar Pradesh-ah pawh ṭek tla avang hian nunna chan mi 20 chuang an awm nia hriat a ni. India-ah hian ṭek tla avangin kum 2014 chhung khan mi 2,500 chuangin nunna an chan niin National Crime Records Bureau chuan a tarlang.