Parliament-ah FM-in Economic Survey 2023-24 pharh: Eptuten exam paper leak chungchang sawi chhuak

Parliament Monsoon Session chu nimin aṭang khan neih ṭan a ni a, union finance minister Nirmala Sitharaman chuan Economic Survey of India 2023-24 chu House pahnihah a pharh. Union budget 2024-25 chu vawiin hian Lok Sabha-ah a pharh dawn a, hemi rual hian Jammu and Kashmir Union Territory budget pawh pharh a ni dawn bawk a ni.

Economic Survey hi sorkar kum tawp, March 31 thlenga sorkar laipui financial performance leh economy dinhmun official report card a ni. Policy thlak danglamte pawh tarlan a ni bawk. Union budget pharh hma nîin ministry of finance-in a tlangzarh ṭhin.

Finance Minister-in Economic Survey a pharh takah hian hripui a len hnuah Indian economy chuan ṭhat lam a pan zel tih tarlangin, FY25 atana India GDP tura chhut chu 6.6 - 7% a nih tih a tarlang. Indian stock market-a retail investor pung chho chak viau chu fimkhur a ngaih thu tarlan a ni. Economy lama hmasawnna tur chuan financial sector chuan banking sector a thlawp ṭhat a ngaih thu pawh tarlan a ni bawk.

Eptuten paper leak chungchang sawi chhuak

Lok Sabha session ṭan ni hian eptu member-te chuan tun hnaia ram pum nghawng, NEET-UG exam paper leak chungchang an sawi chhuak.

Congress party leader chuan examination system-ah buaina nasa tak a awm tawh a, hetih lai hian Education Minister chuan amah thiam inchanin midang a mawhpuh zawk a ni, a ti. Hei hi union education minister Dharmendra Pradhan chuan lo hnialin, kum sarih liam ta chhungin paper leak thleng chungchang finfiahna engmah a awm lo a ti thung.

Samajwadi Party hotu Akhilesh Yadav pawhin BJP sorkar chuan exam paper leak chungchangah record a siam dawn niin a sawi a, 'Ram pumah zirlaite an lungawi lo a, thil thleng chhui naah mi eng emaw zat man an ni tawh bawk. Thil pakhat ka ngen duh chu minister hi a bang lo a nih chuan zirlaiten rorelna dik an hmu dawn lo a ni,' tiin Education Minister chu bang turin a phut.

Paper leak chungchangah eptu lamin sorkar lam nawr chep an tum a, hetih lai hian Speaker Om Birla chuan exam chungchang ringawt buaipui loa, examination system ṭha zawk siam dan tur sawi ho a ngai tiin a lo chhang.

Birla chuan exam system chungchang hi member-ten sawi hona hun ṭha tak an nei dawn a ni tiin, House-a paper leak chungchang lo aupui reng chuan Indian education system leh, khawvelin a hmuh danah nghawng ṭha lo zawk a nei thei dawn a ni tiin a sawi.