Sorkar laipuiin sorkar hnathawkten RSS an zawm phalsak

BJP kaihhruai National Democratic Alliance (NDA) sorkar hnuaia Department of Personnel & Training (DoPT) in office memorandum thar a tih chhuahah, 1966 order-a sorkar hnathawkten politics thila inrawlh organisation an zawm a khap zinga Rashtriya Swayamsevak Sangh (RSS) telh a nihna chu a paih.

Kum 1966 order siam hi July 25, 1970 leh October 28, 1980 ah khan tih chhuah nawn leh a ni a, Atal Bihari Vajpayee kaihhruai sorkar leh, Narendra Modi kaihhruai NDA sorkar term hnih liam taah pawh khan, sorkar hnathawkten RSS zawm khapna siam hi hman chhunzawm reng a la ni. Mahse tun thla tir lama DoPT office memorandum thar tih chhuah chuan, heng order-te hi ennawn a ni hnuah, organisation zawm khap zingah RSS dah tel a ni chu paih a ni ta tih a rawn tarlang a ni.

Congress party chuan he thupek hi an sawisel nasa hle a, India inpumkhatna leh inlungrualna tichhe thei a ni an ti a, hetih lai hian RSS lam chuan sorkar thupek thar hi lawmawm an tih thu sawi thungin, democratic system tichaktu tur an ti ve thung.

Congress hruaitu eng emaw zatin X lamah pawh a sawizui a, senior leader Pawan Khera chuan, 'Kum 58 liam ta khan sorar laipui chuan sorkar hnathawkte chu RSS thiltihnaa in rawlh ve a khap a, mahse Modi-a sorkar chuan he thupek hi a rawn ṭhiat ta a ni," a ti. RSS khap telna hlih a nih chhanah, 'Politics lamah an inhnamhnawih lo ta em ni," tiin a zawt zui bawk.

Hyderabad MP, AIMIM chief Asaduddin Owaisi pawhin sorkar hnathawk chu RSS member ni chungin ram tan rinawm takin rawng a bawl thei dawn lo tiin, RSS khap a nihna chhan chu India consittuion an pawm duh lo a, national flag leh national anthem pawh an pawm lo a ni, a ti. RSS member tinte chuan ram aia Hindutva dah chungnung tura chher vek a ni, tiin a sawi.