SC-in Uttarakhand leh UP sorkar thupek a 'stay' sak

Supreme Court chuan Uttar Pradesh leh Uttarakhand sorkarin Kanwar Yatra kawng paltlanga kawngsira ei tur zuar dawrte hnenah a dawr neitu hming leh thawktute hming tarlang vek tura an hriattirna chu a dan sak.

Court chuan ei siamtute chu a neitu leh thawktu hmingte tarlang turin nawr luih an ni tur a ni lo a ti a, July 26-ah hemi chungchang hi a ngaihtuah chhunzawm leh dawn a ni.

State pahnih thupek chhuah avang hian NGO, Association of Protection of Civil Rights leh Trinamool Congress MP Mahua Moitra bakah midangte pawhin Supreme Court-ah hian petition an thehlut a ni. Petition thehluttute chuan sorkar thupek hian harsatna nasa tak a thlen a, hnam inkarah pawh inthliarna a siam phah niin an sawi.

Petition thehlutte aiawhtu, senior advocate CU Singh chuan sorkar thupekin a nghawngte hi thlai leh thingpui dawr siamtu, mi harsa zawkte an ni tih a sawi a, thupek an zawm loh chuan thuneituten an dawrte pawh an nawrh chhiatsak mai a hlauhthawnawm niin a tarlang.

BJP sorkarna state pahnihten he thupek an tih chhuah hnuah, BJP kaihhruai Ujjain Municipal Corporation pawhin an khawpui chhunga dawr neite chu dawr neitu hming leh mobile number-te an dawr pawn lamah tar chhuak vek turin an ti ve leh bawk.