Delhi polls: Congress, BJP, AAP-te'n hmeichhe Candidate 19 an nei

February 7-a seat 70 awmna, Delhi Assembly inthlan neih tur­ah, party lian pathum Congress, BJP leh AAP-te hmeichhe candidate neih zat belhkhawm chu 19 chiah a ni.

BJP chuan hmeichhe candidate pariat a nei a, an zingah hian Chief Minister candidate atana a ruat Kiran Bedi bakah union minister hlui Krishna Tirath, DUSU president hlui Rekha Gupta leh Nupur Sharma te an tel.

Aam Aadmi Party-in hmei­chhe candidate paruk a nei a, an zingah hian nikum kumtira Delhi-a ni 49 chhung sorkarna an siam ṭuma cabinet minister Rakhi Birla a tel.

Congress party candidate zing­ah hmeichhia panga an awm a, an zingah hian President Pranab Mukherjee-a fanu Shar­mista Mukherjee leh, Arvind Kejriwal-a khingtu tur Kiran Walia-te an tel.

Party lian pathumte'n hmei­chhe candidate an siam hi khaw­pui chhunga hmeichhe vote nei zat thlirin an tlem hle. Assembly seat 70 atana in candidate hi mi 673 an awm a, an zingah hian hmeichhia 66 chiah an tel.

Electoral roll tihchhuah hnuhnung berah Delhi Assembly hnuaiah hian vote nei mi vaibelchhe 1.33 an awm a, an zinga nuai 72 chuang chu mipa an ni a, hmeichhe vote nei nuai 59 vel an awm bawk.

Kum 2013 Assembly in­thlanah khan Congress leh AAP hian hmeichhe candidate paruk ve ve an siam a, BJP in panga a nei thung.

AAP chuan kar kalta Inrinni khan inthlan neih tura atana an party manifesto an tlangzarh a, hetah hian mipuite hnena an thutiam hrang hrang 70 an tarlang. AAP chuan sorkar an siam chuan eiruk dona tur, Jan Lokpal Bill chu ni 15 chhunga hman nghal te, Delhi khawpuia power hman man 50% a tihhniam te, khawpui chhunga free Wi-fi pekchhuahte, hmeichhiate himna atana CCTV camera nuai 10-15 bun te, VAT tihhniamte a tiam.

College thar 20 siam te, private school-a fee pek dan ruahmansakte, Delhi hospital hrang hrangah khum 30,000 siam belhte, khawpui chhungah public toilet nuai hnih siamte, kum nga chhungin hna thar nuai riat siamte an tiam bawk.

AAP manifesto-ah hian state puitlinga Delhi hlankai a nih theihna tura an beih tur thu leh, global city-a siam a, section hrang hrangte tana hmasawnna nasa tak thlentir an tum thu te an tarlang a, mipuite himna atana khawpui chhunga bus tlan zawng zawnga security guard dah a nih tur thu an tarlang bawk.