Saradha scam: Union Minister hlui man a ni

Saradha Group-in investor-te sum tam tham tak a tihchingpensak chhuina kal zelah, Central Bureau of Investigation (CBI) chuan Union Minister hlui Matang Sinh an man. Sinh hi he thubuai kaihhnawihah central minister hlui man hmasak ber a ni.

CBI chuan Sinh hi Saradha group hnuaia company pakhat, Saradha Realty in sum a tihchingpen leh investor-te a bum nia puhna kaihhnawihah man a nih thu a sawi.

Kar kalta Inrinni khan Sinh hi Kolkata-a Special Investigation Team headquarters-ah koh a ni a, hetah hian darkar nga chuang zet thu zawhfiah a nih hnuin man a ni. Hemi hma hian Enforcement Directorate-in thu a lo zawt tawh bawk.

CBI chuan an thil chhuina kawnga thil pawimawh ṭhenkhatah Sinh hian a thhawpui ṭha duh lo niin an sawi a, hei vang hian man loh theih a ni ta lo tih an sawi. CBI hian sum tihchingpen kaihhnawihah hian Saradha Realty director Shibnarayan Das pawh a lo man tawh a, thu an zawhfiahna aṭangin Sinh-a inhnamhnawih dante hriatchhuah a ni.