1984-a Sikh tualvuakna thleng chhui ṭhat leh tum

Justice G.P. Mathur chuan kum 1984-a Sikh mite beihna thleng chungchang chu Special Investigation Team chhui ṭhattir a rawt.

Supreme Court Judge Justice (retd) GP Mathur kaihhruai committee hian kar hmasa khan Home Minister Rajnath Singh hnenah report theh­lutin, anti-Sikh riot case hi SIT chhui ṭhattir turin a rawt. Committee rawtna chungchang hi February 7-a Delhi Assembly inthlan neih zawh hnuah chhanna pek a ni ang.

Kum 1984, October 31-a Prime Minister hlui Indira Gandhi thah a nih hnuah Sikh mite tualvuakna rapthlak tak hi a thleng zui a ni. Delhi khawpui bakah Uttar Pradesh, Haryana, Madhya Pradesh, Maharashtra leh state danga Sikh mite beihnaah mi 3,325 an thi a, an zinga 2,733 chu Delhi-a mite an ni.

BJP chuan a hmain Sikh mite beih an nihna thubuai zawng zawngte chhui ṭhat a lo phut tawh a ni. Justice Nanavati Commission chuan police-te thubuai an khar tawh 241 zinga pali chauh chhui ṭhat turin a rawt a, mahse BJP chuan thubuai dang zawng zawng pawh hi chhui ṭhat vek an phut.

Nikum December 10 han sorkar laipui chuan Sikh mite beih an nih ṭuma thi chhungte hnen­ah zángnadawmna, cheng nuai 5 ṭheuh pek belh rawtna chu a lo pawm tawh a ni. Hemi atana sorkarin sum a senbelh tur hi cheng vaibelchhe 166 a tling.