Sushma Swaraj-in China nena thawhdunna zau zawk siam rawt

China rama cham mek, External Affairs Minister Sushma Swaraj-i chuan China leh India-te'n thawhdunna zau zawk an neih theihna turin rawtna paruk a siam.

Nimin khan Minister Swaraj-i hian Beijing-ah India-China Media forum a hawng a, thu a sawiah ram pahnihte thawhdunna leh inlaichinna chuan hma a sawn zel a ni, a ti. 'Asian century' siam turin ram pahnihte chu inhriatthiam tawnna ṭha zawk nei turin a sawm a, thawhdunna zau zawk awmna turin rawtna paruk a siam. Heng zingah hian thawhdunna huang zauh te, communication lam tihlen te a tel.

Swaraj-i chuan ṭhen­awm ramte nena inlai­chinna kawngah ram pahniha cheng mipuite thlawpna ṭha an neih an ngai a ni, a ti. Ram pa­hnih mipuite inhriatthiam leh inpawh tawnna turin tourism tihchak chu thil ṭangkai tak a ni, a ti.

"China hi sumdawnna kawnga kan thawhpui ram lian ber a ni. Ram pahnihte pawhin investment an ti tawn a, inzawmna zau zawk a awm theihna tura sawiho mek a ni bawk," tiin Swaraj-i chuan a sawi.

Minister chuan Prime Minister Narendra Modi-a'n May thlaa China tlawh a tum thu a sawi a, chumi atana inbuatsaih lawkna tura zin hmasa a ni tih a tarlang.