BJP ad-in sawisel a hlawh, AAP-in ngaihdam dil turin a phut

Delhi Assembly inthlan neih tur puala Bharatiya Janata Party (BJP) in advertisement a siam chu political party dangte'n an sawisel a, Aam Admi Party (AAP) chuan Election Commission-a complain thehluh a tum thu sawiin, BJP chu ngaihdam dil turin a phut.

AAP chuan BJP hian an advertisement siamah hian Agarwal hnam chu hnam bengchheng tiin an sawi a, hetianga bawlhhlawh taka politics an khel hi Delhi mipuite chuan an pawm thei dawn lo, a ti.

AAP hotu Arvind Kejriwal chuan Agarwal hnam an sawi dan chungchangah BJP chu thupha chawi turin a phut. Kejriwal chuan, "BJP hian mimal taka min beihna advertisement pawh a tichhuak nual tawh a, kei bakah ka fate thlenga an beihnate pawh a awm a, mahse ka ngawihsan zel a ni. Keimah min beihna chu ka enliam mai a, mahse tuna an thiltih dan hi chu an pel thui ta mah mah a ni. Agarwal hnam pum chu hnam bengchheng tiin an sawi a ni," a ti.

Kejriwal chuan, "BJP bitum chu keimah ka ni a, ka mimal chungchang chu eng ang pawhin an sawi thei ang. Eng vangin nge kan hnam pum chu an beih kher? Thupha an chawi ngei tur a ni," a ti. AAP chuan BJP thiltih dan hi Election Commission-ah a zualko tur thu a sawi bawk.

BJP hian adverstisement a tihchhuah tharah hian Kejriwal lem hi deusawh taka dahin, a fate hnenah englai maha Congress a thawhpui ngai loh tur thu a hrilh lai tihlan a ni. He ad-ah hian Kejriwal chu hnam bengchheng zinga mi a ni tia ziah lan a ni bawk.

AAP bakah political party dang pawhin BJP advertisement thar hi an sawisel a ni.

BJP chuan Kejriwal hi chhang let nghalin, politics ṭawngkam mai a nih thu an sawi. An ṭawngkam hman chu hnam bil ang zawnga an sawina ni loin, AAP politics kalpui dan sawina atana hman an ni tiin, Kejriwal-a chu mipui rilru hruaikawi tumah a puh let.