Swaraj-i leh China President inkawm
China rama cham mek, External Affairs Minister Sushma Swaraj-i chu nimin khan Beijing-a Great Hall of the People-ah China President Xi Jingping nen an inkawm.
China President Xi hian nikuma India ram a tlawh ṭuma nuam a tih thu leh, India sorkar leh mipuite chunga a lawm thute Swaraj-i hi hrilh a, President Pranab Mukherjee leh Prime Minister Narendra Modi-te chu duhsakna hlan sak turin a chah bawk.
Xi chuan India ram a tlawh hnu hian ram pahnihte inlaichinna pawhin bung thar a kai a, a ṭha lam hawiin hma a sawn zel a ni, a ti. Kumin chhung pawhin inlaichinna kawngah hmasawnna ṭha tak an neih leh ngei a rin thu a sawi.
Swaraj-i hi nimin vek khan 13th Foreign Ministers' Meeting of Russia-India-China Trilateral-ah a tel a, meeting zawh hian Russia minister Sergey Lavrov nen inkawmin, ram pahnihte inlaichinna chungchangte an sawi dun.