Delhi-ah Kristian biak-in suasam a ni

Delhi chhim lam, Vasant Kunj bialah nimin zing khan Kristian biak-in suasam a ni leh. Nikum December thla aṭang khan Delhi khawpui chhungah hian Kristian biak-in ṭum nga suasam a ni tawh.

Zing dar 3 vel khan mi tu tih hriat lohte'n St Alphonsa Church-ah kalin main gate an ti chhia a, biak in chhunga cupboard-te tichhiain, ṭawngṭaina hmanruate an paihdarh a ni.

Ministry of home affairs-in Delhi Police-te hnenah sakhaw hmun pawimawh hrang hrangah CCTV dah vek tura a hriattir hnuah, January 14 khan Vikaspuri-a Catholic biak-in chu mi sual pahnihin an suasam bawk.

January 3 khan Rohini-a Church of Resurrection-a Christmas Crib chu halral a ni. Okhla-a Our Lady of Fatima Forane Church-a biak in turkverh-te chu December 7-a mass neih laiin tu tih hriatlohte'n an lo vawm keh sak a, Krismas hma deuh khan Dilshad Garden-a St Sebastian Catholic Church chu hal a ni bawk.